PAN E VIN

L'era na not strigada:

na scuria un scuron,

na nibia sula strada,

no se vedea un on.

Dal Piave un fret de iazh

sgorlea i castagner

che i spasemea i brazh

fa rode de un muner.

De boto un vent rabios

sufia tute e nequizhie.

Gli spiriti infernai

scadena tuti i mai:

descartozha e panoce,

raspa le roe dai fos,

tira su toch stizh cioch,

dapartut vola foje.

Sta enorme secaria

s'ingruma sul Montel,

la cres e l'impenis

tuta intiera na val.

Sprissa un s'ciantis fa bissa:

el muciaron s'inpissa

in pressa e furia ingrossa

in poch el va montando

deventa banpe vive.

Tra s'cioch e s'ciochetòn

un diagol col forcon

frissega e fa falive.

Bubarata grandiosa!

La vede Belun alta,

i coli de Vicensa

e gondole a Venezhia.

E par incantamento

din din din din dondea

sona la campanea

dela vecia Certosa.

Fursi la sveja i frati

par pregar matutin;

o fursi ai pori cristi

ghe mostrerà el destin?

Ed eco el gran miracol:

da zhimiteri tombe,

da lapidi saceli,

da cipi monumenti,

da Biaden a Cornuda,

da Croseta a Nervesa:

zhentener e miler,

miler e zhentener

cristi cole stanpele,

zhoti de na gamba;

cristi in carozhea,

zhoti de tute do;

cristi co 'n brazh mecanico,

cristi orbi cristi sordi,

cristi sbusai in panzha,

senzha uso de cul.

Ecoi tuti in sinedrio

intorno al gran fogon

questionando interogando

qualchedun bestemando

l’Altisimo dei cieli:

Von combatest par cossa?

Parchè son desgrazhiai?

Sone morti par chi?

Un general panzhon,

col peto de medaje,

in nome dela Patria

ricorda tut comoso

el senso del dovere,

l'amor ai focolari

e compagnia cantando.

I pori cristi in crose

minacia coe stampele:

No rompar i maronii!

El general fa muci,

se sconde drio un canton.

E continua a rivar

zhentener e miler,

miler e zhentener

de soldai pori cristi

do a do tre a tre

a quatro a zhinque a oto

a compagnie a ploton

a intiere division.

I piande i osa i zhiga

clamantes et dicentes:

lé questi i mirabilia

de l'Omnipotens Deus?

Jacomo el sagrestan

in nome de l'Altisimo

ghe spiega co pasienzha

al grege popolare:

sié divinitatis consortes,

l'Omnipotens Deus

ha creà i on mirabiliter

e mirabilius li ha reformai.

E i soldai pori cristi:

Ghe vol un bel corajo

se i dona et i munera

lé tute desgrazhie!

Jacomo el sagrestan:

Spetè,la mort lé un sono.

I desgrazhiai fa vu

no finirà pavei.

Co sonarà la tuba

multorum angelorm

risorgerè in excelsis

fa but in primavera.

La procession continua.

Dale miniere belghe,

dale usine francesi,

dae Meriche dae Afriche,

pori cristi emigranti

fa la stessa question:

Indove finiràe

tante tribolazhion?

Jacomo el sagrestan

in nome de l'Altisimo

spiega co pasienzha

al grege popolare:

ghe vol rasegnazhion,

adversantia tolerare

par guadagnar la gloriam

aeternae beatitudinis.

Ades riva na ondata

de pori cristi magri,

pi’ magri de bacheton:

i fitavoi, i pisnét.

Braghesse coi tacon,

camise tute bus,

calzhet de slacaron,

scarpe de len dur.

I pori cristi in crose

se lamenta fa Giobe,

ma no è studiai fa Giobe

che po' lè mort pasù.

Un diletante in storia

vol strolegar sapiente…

I pori cristi zhiga:

maledeti dotori

che scava le radis

magnifiche dei siori

e intanto i sepelis

i pori cristi in crose.

Un poeta taca musica:

Ah, Venezhia palassi

de oro lampadari

merleti gondolieri…

E i pori cristi zhiga:

Paroni schegaroni,

siorasse col capel

che magna i poeastrel.

In malora poeti

mandolini de siori,

che masena i dolori.

Co le so rime rare

i ninola le siore

strache de star de bando.

Ah, Venezhia del bosch

Montel cusine negre

de fun inpestae de mosche

le boche senzha dent.

Che cucagna magnar

verze poenta e muset.

Putana de Venezhia

savon la to grandezha

fata dea nostra fan.

Basta magnificar

i nostri spolpadori!

I pori cristi ha pers

parfin la dignità,

la memoria dei fioi.

Jacomo el sagrestan

par darghe na rason

ai pori cristi in crose

de essar rasegnadi,

cata a risposta adata:

Vegnarà el dies irae,

vegnarà el dies illa

par la contessa Belati.

Sentì la tuba mirum

angelorum multorum

come la spargens sonum.

Vien Angei Serafini,

po’ riva i Cherubini,

riva Dominassioni.

Che longa procession!

Tuti habentes thuribulum,

tuti dicentes Amen!

Eco el judex venturus

tremendae majestatis

che salva,chi vol, gratis.

Fioi,ste chieti,scoltè.

Ssst!Scumizhia el giudissio

de l'Omnipotens Deus!

San Piero,porta el Liber

quelo scriptus in quo

lé totum continetur.

Par ogni camp de tera

-mi lede- un sach de afito

in formento bel seco,

formento ben cribrà,

portà col caro a casa

dea parona contessa.

I pori cristi in crose

se grata se remena

come se i vesse e pulzh.

El sagrestan continua:

No bastava l'afito?

Parchè altre regalie

tut de soramarcà?

Do zhest de pon,de pér,

do quarte de castagne,

zhinquezhento fassine …

e a sposa del fitavol:

la lissa granda a gratis.

I pori cristi in crose

se grata, se remena

come se i vesse e pulzh.

La parona dirà:

Ingemisco.Mea culpa.

Misere mei Domine!

Tasi su,slandrona!

No ho finì a sentenzha,

dirà el Judex venturus.

Do capon a Nadal,

do gaine a carneval,

a Pasqua un bon agnel...

Ingemisco ingemisco.

Miserere mei, Domine!

Mea culpa, parce Domine!

I pori cristi in crose

domanda al sagrestan:

Par riparar la vila?

Nel Liber ghe nè tut:

al fitavol spetava

tute e fadighe a gratis.

I pori cristi zhiga:

Demonia putanona

te patirà el cancaro!

Ingemisco ingemisco,

miserere mei Domine!

Mea culpa, parce Domine!

L'Omnipotens tremendus:

Stropa quela bocassa!

Sfondrada de veciassa,

parchè a ti l'ua più bela?

I pori cristi in crose

fa si fa si coa testa.

Ingemisco ingemisco…

Misere mei Domine!

Son stada pecatrice!

L'Altissimo omnipotens

super montem fumantem

in nubibus excelsis:

Contessa confutata,

desprofonda in flammis

cum tuti i maledictis.

I pori cristi in crose

portantes faldin forche,

portantes restei britole,

clamantes :La Justizhia

in final lè rivada!

mena le gambe,vaca!

I ride:sietu straca?

Varda che bel scaldin!

Spentona la veciassa

dentro la bubarata.

Le fiame la straforma

in diagol infernal.

Par saeculorum saecula

dentro el tartaro obscuro!

Dentro el profundo lacu!

Dopo sta punizhion

i pori cristi in crose

se sente un poch risorti.

Ma i pori cristi speta

anca la so sentenzha.

Jacomo no l'ha dubi.

El Judex majestatis

tremendo coe contesse

salvarà tuti a gratis.

E ti,miser pisnét,

E ti, fitavol supplex,

vien qua cum benedictis.

Ascendarè in caelum

cum Angelis Arcangelis

Serafini Cherubini

Apostolorom sanctorum

Evangelisti Troni

Profeti Maddalene

virgines puerorum

habentes thuribulum

su su in excelsis Deo

nela lux perpetua

sonando tube de oro

portantes olivarum

cum citharis cum cimbalis

respirando fumus

de incensi e de mirre

dicentes aleluja

clamantes osanna

in saeculorum saecula.